കെട്ടിടം പണിയുമായി ബന്ധപെട്ടു മണ്ണ് നീക്കം ചെയ്യുവാനുള്ള അനുമതി ലഭിക്കാന്‍

 

സാധാരണ മണ്ണിനു  ധാതു ഗതാഗത പെര്‍മിറ്റും പാസ്സുകളും അനുവദിക്കുന്നതിനുള്ള നടപടിക്രമം

KMMC Rules ചട്ടം 14 (2)  പ്രകാരമാണ് കെട്ടിടം പണിയുമായി ബന്ധപ്പെട്ട ആവശ്യത്തിന് സാധാരണ മണ്ണ് എടുത്തു നീക്കം  ചെയ്യുന്നത് . റൂളിന്റെ കോപ്പി മൈനിംഗ് ആൻഡ് ജിയോളജി വകുപ്പിന്റെ വെബ്‌സൈറ്റിൽ നിന്ന് (www.dmg.kerala.gov.in) ഡൗൺലോഡ് ചെയ്യാം. ഭേദഗതി ചെയ്ത നിയമങ്ങൾ  വെബ്‌ സൈറ്റിലെ മെനു-ഓർഡറുകൾക്ക് കീഴിൽ ഡൗൺലോഡ് ചെയ്യാൻ ലഭ്യമാണ്.

കെഎംഎംസി ചട്ടങ്ങൾ 31.3.2023 നു ഭേദഗതി ചെയ്യുന്നതിന് മുമ്പ്, ബിൽഡിംഗ് പെർമിറ്റ് ഉടമകൾ മിനറൽ ട്രാൻസിറ്റ് പാസ്സുകൾക്കായി മൈനിംഗ് ആൻഡ് ജിയോളജി വകുപ്പിന്റെ ജില്ലാ ഓഫീസിനെ സമീപിക്കണമായിരുന്നു. എന്നാല്‍ മൈനിംഗ് ആൻഡ് ജിയോളജി വകുപ്പിന് ജില്ലയില്‍ ഒരു ഓഫീസ് മാത്രം ഉള്ളതിനാല്‍ പൊതുജനത്തിന്റെ ബുദ്ധിമുട്ട് കണക്കിലെടുത്ത് 01.04.2023     മുതല്‍  ബിൽഡിംഗ് പെർമിറ്റ് ഉടമകൾക്ക് 278.7 ചതുരശ്ര മീറ്റർ (3000 ചതുരശ്ര അടി) വരെ പ്ലിന്ത് ഏരിയ ഉള്ള കെട്ടിടങ്ങൾക്ക് കെട്ടിട പെർമിറ്റ് നൽകുന്ന അതോറിറ്റിയിൽ (പഞ്ചായത്ത്‌ /മുനിസിപാലിറ്റി / നഗരസഭ) നിന്ന് മിനറൽ ട്രാൻസിറ്റ് പാസുകൾ ലഭിക്കുന്ന തരത്തില്‍ നിയമം ഭേതഗതി ചെയ്തിട്ടുണ്ട്. പ്ലിന്ത് ഏരിയ 278.7 ചതുരശ്ര മീറ്ററിൽ കൂടുതലാണെങ്കിൽ, കെട്ടിട പെർമിറ്റ് ഉടമകൾ പാസ്സിനായി  മൈനിംഗ് ആൻഡ് ജിയോളജി വകുപ്പിന്റെ ജില്ലാ ഓഫീസിനെ തന്നെ  സമീപിക്കണം.

      പഞ്ചായത്ത്‌/മുൻസിപാലിറ്റി/ നഗരസഭ  മുഖേന ധാതു ഗതാഗത പെര്‍മിറ്റും പാസ്സുകളും അനുവദിക്കുന്നതിനുള്ള നടപടിക്രമം -278.7 ചതുരശ്ര മീറ്റർ (3000 ചതുരശ്ര അടി) വരെ പ്ലിന്ത് ഏരിയ ഉള്ള കെട്ടിടങ്ങൾക്ക് 

കെട്ടിടനിർമാണ പെർമിറ്റിന് അപേക്ഷിക്കുമ്പോള്‍ തന്നെ പ്ലോട്ടില്‍ നിന്നും  മണ്ണ് നീക്കം ചെയ്യേണ്ടതുണ്ടോ എന്ന് ഉറപ്പുവരുത്തേണ്ടതും, മണ്ണ് നീക്കം ചെയ്യാനുണ്ടെങ്കില്‍   നിർദ്ദിഷ്ട സാധാരണ മണ്ണിന്റെ ഖനനത്തിന്റെ വിശദാംശങ്ങൾ, എടുക്കുന്ന മണ്ണ് പ്ലോട്ടില്‍ തന്നെ നികത്താൻ ഉദ്ദേശിക്കുന്നുണ്ടെങ്കില്‍ അതിനു ഉപയോഗിക്കേണ്ട മണ്ണിന്റെ അളവ്, കെട്ടിട നിർമ്മാണ സ്ഥലത്ത് നിന്ന് പുറത്തേക്ക് നീക്കാൻ ഉദ്ദേശിക്കുന്ന ബാക്കി അളവ് എന്നിവ വ്യക്തമായി പ്ലാനില്‍ കാണിക്കേണ്ടതാണ്. അപേക്ഷകന്റെ അപേക്ഷയിലുള്ള വസ്തുതകള്‍ ശരിയാണെങ്കില്‍ മണ്ണിന്റെ അളവ് കൂടി പരിശോധിച്ചശേഷം ബിൽഡിംഗ് പെർമിറ്റും പ്ലാനും അനുവദിക്കാവുന്നതുമാണ്. തുടര്‍ന്ന്   പെർമിറ്റ് ഉടമയ്ക്ക് മൂവ്മെന്റ് പെർമിറ്റിനും മിനറൽ ട്രാൻസിറ്റ് പാസ്സിനും വേണ്ടി വെള്ളക്കടലാസിൽ സെക്രട്ടറിക്ക് മുമ്പാകെ ഒരു അപേക്ഷ സമർപ്പിക്കാം.  അപേക്ഷാ ഫീസ് ഇല്ല. അപേക്ഷയിൽ പുറത്തേക്ക് നീക്കം ചെയ്യാൻ നിർദ്ദേശിച്ചിരിക്കുന്ന സാധാരണ മണ്ണിന്റെ അളവും ധാതുക്കളുടെ ഗതാഗതത്തിനായി ഉപയോഗിക്കാൻ ഉദ്ദേശിക്കുന്ന വാഹനത്തിന്റെ വാഹക ശേഷി (ടണ്ണിൽ), പ്രതിദിനം കൊണ്ടുപോകാൻ ഉദ്ദേശിക്കുന്ന ലോഡുകളുടെ എണ്ണം മുതലായവ അടങ്ങിയിരിക്കണം. കൂടാതെ, ഫോം T യിൽ  സത്യവാങ്മൂലം പെർമിറ്റ് ഉടമ സെക്രട്ടറിക്ക് നൽകേണ്ടതാണ്. സാധാരണ മണ്ണിന്റെ അളവ്, വാഹനത്തിന്റെ വാഹകശേഷി, പ്രതിദിന ലോഡുകളുടെ എണ്ണം എന്നിവയുടെ അടിസ്ഥാനത്തിൽ, 2015ലെ കേരള മിനറൽസ് (പ്രിവൻഷൻ ഓഫ് ഇല്ലീഗൽ മൈനിങ്, സ്റ്റോറേജ് ആൻഡ് ട്രാൻസ്പോർട്ടേഷൻ) ചട്ടങ്ങളിലെ ഫോം S ല്‍  മൂവ്മെന്റ് പെര്‍മിറ്റും  ഫോം ഒ(എ) യിൽ ആവശ്യമായ മിനറൽ ട്രാൻസിറ്റ് പാസ്സുകളും  നല്‍കാം. പെർമിറ്റ് ഉടമയോട് ആവശ്യമായ എണ്ണം മിനറൽ ട്രാൻസിറ്റ് പാസ്സുകൾ പുസ്തക രൂപത്തിൽ (ഒറിജിനൽ, ഡ്യൂപ്ലിക്കേറ്റ് എന്നിവ സഹിതം) അച്ചടിക്കാൻ ആവശ്യപ്പെടാം, അപ്രകാരം ഹാജരാക്കുന്ന പാസ്സിൽ  സെക്രട്ടറിയുടെ ഒപ്പ്, പദവി സീല്‍ , ഓഫീസ് സീൽ, ട്രാൻസിറ്റ് പാസ്സിന്റെ സാധുത സീൽ എന്നിവ വെക്കേണ്ടതാണ്.

പെർമിറ്റ് ഉടമ പാസ്സ് അനുവദിച്ചു  ഒരു വർഷത്തിനുള്ളിൽ നിർമ്മിക്കാൻ ഉദ്ദേശിച്ച കെട്ടിടത്തിന്റെ അടിത്തറയെങ്കിലും നിർമ്മിക്കുന്നതിൽ പരാജയപ്പെട്ടാൽ, പെർമിറ്റ് ഉടമയുടെ പ്രവൃത്തി നിയമവിരുദ്ധമായി കണക്കാക്കുകയും പെർമിറ്റ് ഉടമ ഒടുക്കിയ  റോയൽറ്റിക്ക് പുറമേ റോയൽറ്റിയുടെ 5 ഇരട്ടി കൂടി പിഴയായി ഒടുക്കേണ്ടതാണ്.

മൂവ്മെന്റ് പെർമിറ്റും മിനറൽ ട്രാൻസിറ്റ് പാസ്സും നേടിയ പെർമിറ്റ് ഉടമ ഓരോ ലോഡ് മണ്ണിനും  മിനറൽ ട്രാൻസിറ്റ് പാസ്സ് നൽകണം. കൂടാതെ വാഹന ഡ്രൈവർക്ക് പാസ്സ് നൽകുന്നതിന് മുമ്പ് പാസ്സിൽ എഴുതിയിരിക്കുന്ന വ്യവസ്ഥകൾ അനുസരിച്ച് പാസ്സ് ശരിയായി പൂരിപ്പിച്ച് ഒപ്പിടുകയും വേണം.

പെർമിറ്റ് ഉടമയ്ക്കു അനുവദിച്ച ധാതുവിനേക്കാൾ അധികമായി സാധാരണ മണ്ണ് നീക്കം ചെയ്യുകയോ അല്ലെങ്കിൽ അനുവദനീയമായ ഏരിയക്കു  പുറത്ത് നിന്ന് സാധാരണ മണ്ണ് നീക്കം ചെയ്യുകയോ ചെയ്താൽ, അത്തരം നടപടി നിയമവിരുദ്ധമായി കണക്കാക്കുകയും അത്തരം പെര്‍മിറ്റ്‌ ഉടമകളില്‍ നിന്നും  റോയൽറ്റിയുടെ അഞ്ചിരട്ടി ഈടാക്കുകയും ചെയ്യണം. കൂടാതെ മണ്ണ് എടുക്കാന്‍ നല്‍കിയ അനുമതി റദ്ദ് ചെയ്യാവുന്നതുമാണ്.

മുൻകൂട്ടിക്കാണാത്ത കാരണങ്ങളാൽ, പെർമിറ്റ് ഉടമയ്ക്ക് മൂവ്മെന്റ് പെർമിറ്റ്/മിനറൽ ട്രാൻസിറ്റ് പാസ്സുകളുടെ കാലഹരണ തീയതിക്കുള്ളിൽ ജോലി പൂർത്തിയാക്കാൻ കഴിഞ്ഞില്ലെങ്കിൽ, ടിയാന് മൂവ്മെന്റ് പെർമിറ്റിന്റെയും പാസ്സുകളുടെയും കാലാവധി നീട്ടി കിട്ടാന്‍ അപേക്ഷ സമർപ്പിക്കാം. കാരണം യഥാർത്ഥമാണെങ്കിൽ സെക്രട്ടറിക്ക് മൂവ്മെന്റ് പെർമിറ്റും പാസ്സുകളും നീട്ടാൻ കഴിയും.

മൈനിംഗ് ആൻഡ് ജിയോളജി വകുപ്പിന്റെ ജില്ലാ ഓഫീസിൽ നിന്ന് മൂവ്മെന്റ്പെര്‍മിറ്റും മിനറൽ ട്രാൻസിറ്റ് പാസ്സുകളും നേടുന്നതിനുള്ള നടപടിക്രമം

കെട്ടിടത്തിന്റെ വിസ്തീർണ്ണം (plinth area)  278.7 ചതുരശ്ര മീറ്ററിൽ (3000 ചതുരശ്ര അടിയില്‍) കൂടുതലാണെങ്കിൽ, താഴെപ്പറയുന്ന രേഖകൾ സഹിതം വെള്ളക്കടലാസില്‍  ഒരു അപേക്ഷ ജില്ലാ ജിയോളജിസ്റ്റിന് സമർപ്പിക്കേണ്ടതാണ്. അപേക്ഷ ഫീസ്‌ ഇല്ല. റോയല്‍റ്റി ഒടുക്കേണ്ടതാണ് .   

1.    വില്ലേജ് ഓഫീസിൽ നിന്ന് ലഭിക്കുന്ന ലൊക്കേഷൻ സ്കെച്ച് (പഞ്ചായത്തില്‍  സമർപ്പിച്ച ലൊക്കേഷൻ സ്കെച്ചിന്റെ പകർപ്പ് മതിയാകും)

2.    കൈവശാവകാശ സർട്ടിഫിക്കറ്റിന്റെ പകർപ്പ്

3.    അപേക്ഷകന്റെ ഐഡി കാർഡിന്റെ പകർപ്പ് (സ്വയം സാക്ഷ്യപ്പെടുത്തിയത്)

4.    ബിൽഡിങ് പെർമിറ്റ് പകർപ്പ് (സ്വയം സാക്ഷ്യപ്പെടുത്തിയത്)

5.    അംഗികരിച്ച ബിൽഡിങ് പ്ലാനുകൾ (നീക്കേണ്ട സാധാരണ മണ്ണിന്റെ വിശദാംശങ്ങൾ സംരക്ഷണ ഭിത്തിയുടെ രൂപകൽപ്പന ഉള്‍പ്പടെ പ്ലാനുകളിൽ ഉണ്ടെന്ന് ഉറപ്പാക്കുക)

6.    നോട്ടറൈസ് ചെയ്ത സത്യവാങ്മൂലം (ഫോറം T യിൽ തയ്യാറാക്കിയത്)

7.    ഗതാഗതത്തിനായി ഉപയോഗിക്കാൻ നിർദ്ദേശിച്ചിരിക്കുന്ന വാഹനങ്ങളുടെ തരം, പ്രതിദിനം കൊണ്ടുപോകാൻ ഉദ്ദേശിക്കുന്ന ലോഡുകളുടെ എണ്ണം

8.    ബില്‍ഡിംഗ്‌ പെര്‍മിറ്റ്‌  ഉടമ ഭൂമിയുടെ ഉടമ അല്ലെങ്കില്‍ ഭൂമിയുടെ ഉടമയിൽ നിന്ന് 200 രൂപ വിലയുള്ള സ്റ്റാമ്പ് പേപ്പറിൽ തന്റെ വസ്തുവിൽ നിന്ന് ധാതുക്കൾ ഖനനം ചെയ്യുന്നതിനും കൊണ്ടുപോകുന്നതിലും എതിർപ്പില്ല എന്ന് കാണിച്ചുള്ള നോട്ടറി അറ്റസ്റ്റ് ചെയ്ത  സമ്മതപത്രം.

ജില്ലാ ഓഫീസിലെ ഉദ്യോഗസ്ഥന്‍ സ്ഥലം സന്ദർശിച്ചതിന് ശേഷം അപേക്ഷയിലുള്ള വിവരങ്ങള്‍ ശരിയാണെങ്കില്‍  അനുമതി നല്‍കുന്നതായിരിക്കും.  സന്ദർശന വേളയിൽ ഖനനം നടക്കുന്ന സ്ഥലം എളുപ്പത്തിൽ തിരിച്ചറിയുന്നതിനായി കുറ്റി സ്ഥാപിക്കണം. സ്ഥലം പരിശോധിച്ച് മറ്റേതെങ്കിലും അധിക വിവരങ്ങൾ അവശ്യപ്പെട്ടാല്‍ ആയതുകൂടി നല്‍കേണ്ടതാണ്.
അപേക്ഷ ക്രമപ്രകാരമെങ്കില്‍, പെർമിറ്റ് ഉടമയോട് ഒരു ടണ്ണിന് 40 രൂപ നിരക്കിൽ റോയൽറ്റി അടയ്ക്കാൻ ആവശ്യപ്പെടുകയും മൂവ്മെന്റ് പെർമിറ്റും പാസ്സുകളും നൽകുകയും ചെയ്യും. പെർമിറ്റ് ഉടമ പാസ്സുകൾ ഒരു പുസ്തകത്തിന്റെ രൂപത്തിൽ അച്ചടിപിച്ച് ഹാജരാക്കണം  (ഒറിജിനലിലും ഡ്യൂപ്ലിക്കേറ്റിലും).

അപേക്ഷകന്റെ ഉത്തരവാദിത്തങ്ങൾ

·        ഖനനം ചെയ്യേണ്ട സാധാരണ മണ്ണിന്റെ  അളവ് കൃത്യമായി കണക്കാക്കിയിട്ടുണ്ടെന്നും ഖനനത്തിന്റെ വിസ്തീർണ്ണം കൃത്യമായി നിർണ്ണയിച്ചിട്ടുണ്ടെന്നും ഉറപ്പാക്കുക. കുഴിച്ചെടുക്കേണ്ട ധാതുക്കളുടെ അളവ് കൃത്യമായി പ്ലാനുകളിൽ കാണിക്കണം. വലിയ പ്ലോട്ട് ആണെങ്കില്‍ മണ്ണ് എടുക്കേണ്ട സ്ഥലം കുറ്റി നാട്ടി വേര്‍തിരിക്കുക.

·        മൂവ്മെന്റ് പെര്‍മിറ്റ്‌ കാലാവധി അവസാനിക്കുന്നതിനു  മുമ്പ് പണി പൂർത്തീകരിക്കുന്നതിനായി ആളുകളെയും യന്ത്രങ്ങളും വാഹനങ്ങളും തയ്യാറാക്കി വയ്ക്കുക.

·        സത്യവാങ്മൂലം ശരിയായി തയ്യാറാക്കിയിട്ടുണ്ടെന്നും നോട്ടറി അഭിഭാഷകന്റെ മുമ്പാകെ ഒപ്പിട്ടിട്ടുണ്ടെന്നും ഉറപ്പാക്കുക.

·        പെര്‍മിറ്റ്‌ ഉടമ ഭൂമിയുടെ ഉടമ അല്ലെങ്കില്‍ ഭൂമിയുടെ ഉടമയിൽ നിന്ന് 200 രൂപ വിലയുള്ള സ്റ്റാമ്പ് പേപ്പറിൽ തന്റെ വസ്തുവിൽ നിന്ന് ധാതുക്കൾ ഖനനം ചെയ്യുന്നതിനും കൊണ്ടുപോകുന്നതിലും എതിർപ്പില്ല എന്ന് കാണിച്ചുള്ള നോട്ടറി അറ്റസ്റ്റ് ചെയ്ത  സമ്മതപത്രം  വാങ്ങണം .

·        മൂവ്മെന്റ് പെര്‍മിറ്റും പാസ്സും ലഭിച്ചതിനു ശേഷം മാത്രം മണ്ണ് ഖനനം ചെയ്യുവാന്‍ പാടുള്ളൂ.

·        ഖനനത്തിന്റെ ആഴം 1.5 മീറ്ററിൽ കൂടുതലാണെങ്കിൽ (തൊഴിലാളികളുടെ സുരക്ഷ, നിർമ്മിക്കാൻ പോകുന്ന കെട്ടിടങ്ങൾ, സമീപത്തെ വസ്തുവകകളുടെയും കെട്ടിടങ്ങളുടെയും സുരക്ഷ എന്നിവയ്ക്കായി) ശരിയായ രീതിയിലുള്ള  സംരക്ഷണ ഭിത്തി നിര്‍മിക്കുന്നതിനു നടപടി സ്വീകരിക്കുക. സംരക്ഷണ ഭിത്തി നിര്‍മിക്കുന്നതിനുള്ള വിവരം പ്ലാനില്‍ കാണിക്കേണ്ടതാണ്.

·        പാസ്സ് ലഭിച്ചു ഒരു വര്‍ഷത്തിന്നുള്ളില്‍ കെട്ടിടത്തിന്റെ അടിത്തറയെങ്കിലും നിർമിക്കേണ്ടതായതിനാൽ, മൂവ്മെന്‍റ്റ് പെര്‍മിറ്റിനു അപേക്ഷിക്കുന്നതിന് മുമ്പ് കൃത്യമായ ആസൂത്രണം നടത്തണം.

·        മിനറൽ ട്രാൻസിറ്റ് പാസ്സുകൾ ശ്രദ്ധയോടെ കൈകാര്യം ചെയ്യുക, പാസ്സുകൾ ദുരുപയോഗം ചെയ്യാൻ ആരെയും അനുവദിക്കരുത്. ഓരോ ലോഡ് മണ്ണിനും  ഒരു പാസ്സ് വീതം  എഴുതി നല്‍കുന്നുണ്ട് എന്ന് ഉറപ്പാക്കുക. ഉപയോഗിക്കാത്ത പാസ്സ് തിരികെ ഓഫീസില്‍ നല്‍കുക.

·        ഏതെങ്കിലും കാരണത്താല്‍ മണ്ണ് എടുക്കാന്‍ പറ്റിയില്ലെങ്കില്‍ പ്രസ്തുത വിവരം പാസ്സിന്റെ കാലാവധി തീര്‍ന്നു 2 ആഴ്ചക്കുള്ളില്‍ ഓഫീസിനെ അറിയിക്കുക.

·        കുന്നില്‍ ചെരുവുകളില്‍ നിന്നും മണ്ണ് നീക്കുന്നത് മണ്ണ് ഇടിയാനും ഉരുള്‍പൊട്ടല്‍ ഉണ്ടാകാനും സാധ്യത വര്‍ദ്ധിപ്പിക്കുന്നതിനു കാരണമാകുന്നതിനാല്‍ ശരിയായ പഠനം നടത്തി വേണം അപ്രകാരമുള്ള പ്രവര്‍ത്തികള്‍ ചെയ്യാന്‍. ജിയോ ടെക്‌നിക്കൽ റിപ്പോർട്ട് അധികൃതർ ആവശ്യപ്പെടുന്നവേളയില്‍ ആയത് തയ്യാറാക്കി നല്‍കേണ്ടതാണ്.

·        നീക്കം ചെയ്യുന്ന മണ്ണ് നിക്ഷേപിക്കാന്‍ പറ്റിയ സ്ഥലം കണ്ടുപിടിക്കുക.

·        തന്റെ ഭൂമിയില്‍ നിന്നും  എടുക്കുന്ന മണ്ണ് തണ്ണീര്‍തടം, നെല്‍പാടം എന്നിവ നികത്തുവാന്‍ ഉപയോഗിക്കുന്നില്ല എന്ന് ഉറപ്പു വരുത്തുക.

Disclaimer

The information on this website is provided "as is" and "without warranty." In terms of how this information is used or the results of its usage, the author disclaims all liability. Users should consult the original rules or get in touch with the relevant department for more information if there are any inconsistencies, questions, or confusion.

Please send your comments/suggestions to theminemapper@gmail.com